VASTELOAVEND

D’r vasteloavend begint in dis kirch, wie jiddes joar, 
Dat is wiechtig is, dat is vuur jidderinge woar.
Um vaan d’r Herrjod tse vroage
um oos te zaene vaanoes d’r hemmel doaboave.
Dat dis vasteloavendsdaag vuur jidderinne moage sjlaage 
En dat vuur ons joot kinnen vermaache.
Doarum is d’r prins en ziene hofstaat hei tsezamen
En noa mieng jebede zaat uur mit overtuuging allemoal ‘amen’.
Gewoapend mit zienge scepter in de hand
rejiert d’r René noen uvver ’t jantse Völser land.
Natuurliech wil iech es pastoër hem iere
En hem vaan hatse grateliere

Jiddere prins hat zieng ordens als zieng juwele
Die hae daan riefliech oes kan deele. 
Iech han miech drum ooch jet bedaat
En hem ing orde oes Vlodrop, woa iech pastoer woar,  mit je braat,
Iech han ing orde vuur dizze prins
De sjunste die ste me mer vinge kins.
Koom noe, René, koam noen mer noa boave, drum, 
Daan hang iech diech mieng orde um.

Miech is jezaat:  mit d’r René mot uur nit laache.
want inge verhoezer will ummer jeschäfte maache.
Verhoeze en mit meubele sjleefe, dat is zieng vak
Aan zien jroesse heng tse zie, vuur hem d’r juuste bedriefstak. 
Mos ing kas noa boave of noa onge,  me kaan ‘t hem vroage 
doamit kan hae ooch op ing groese ervaring boage.
Huuj kunt hae noa de kirch um tse baene
dat d’r Herrgod ooch hem als prins moag zaene.

Vuur d’r prins en vuur alle luuj sjteet de parochie jereed  
Vuur oud en vuur joonk,  bij vruid en beij leed.
Um ee kenke tse losse deufe en sjpieder de iesjte communie tse jaeve.
Dis kirch helpt de luuj durch ‘t janze laeve.
Dis kirch is de zieël vaan oos Vols, en vuur jidderinge.
Oahne kirch zowwe vuur nit laeve kinne.
D’r Herrgod is oos dis kirch waed
Hae is d’r Huuchste, zoe wie me dat zaet.

Mèr de wiesheed vaan d’r biebel  is wiesheed vuur jidderinne vaan oos,
Dat jidderinne ziene ieér ooch in dis daag ummer hoëch hotte moss.
Vier verdrage nit, dat inge luucht of roddelt,
Mèr anstand hält en dis daag ooch nit aan de norme rowwelt.
Dis daag kinne vuur bewieze,  doavuur bin iech hiël content,
Dat me aan d’r boom ooch de äppel herkint.

D’r Herrjot liet ooch zelf zië, wat vuur doë mosse 
vuur moage ozze jeloof noets achterwaege losse.
“Wint inge blinge d’r angere d’r weg willt wiese
Dan zunt ze al jow tsezame in d’r drek aan ’t biese.”
Vuur mosse vorsicht zië um d’r angere de les tse laeze
Want jidderinne hat faehler en dat darve veur nit verjaese.
Vuuer kieke noa d’r splinter bij d’r angere in het auw,
En uvver d’r eege balk zient vuur nit zoë jenau
Wae jeleuvig is, zal zie jeleuf losse zieë in daad en in woad
En macht ziech uvver onraet hiël erg koad.
Aan de eppel kent in me d’r jaat d’r boom  
Sjlaete eppel vaan jow böm jiët ’t koom.
Dis daag kinne vuur losse zië dat d’r Herrgod oos hat jemaat
En dat hae voor oos nuuks sjunners es vasteloavend in Vols hat bedaat.

Ja, leef vasteloavendsvrung, wint uur mer wit 
ohne d’r Jezus jeet ‘t in het laeve nit.
Dat is jing wietz, dat is ozze jeloof,
Vuur ‘t woad van d’r Heer moage vuur nit langer zië doof. 
Wenn ste jeleufs, daan hilt ste diech aan Herrejots woad
En zuk ste bei d’r Herrejod ummer jowwe road 
um jet sjuns tse maache vaan ‘t laeve
dat vorm kriegt oonger d’r Herrejots zaege.

Oahne d’r Herrjod junt de luuj alling vuur zich zelf laeve 
en bezurge oos crisis noa crisis woa vuur vaan baeve.
Wenn ste jeleufs, hast inge houvast in de hank
En drieft die laeve nit aaf noa de verkierde kank.
Wenn ste beij de Moddrjoades ee weesjejroet jees baene en ing kaets liets brenne
en heur vroags um wer d’r taege tse kenne:

Daan huure vuur op mit alling mer aan ooszelf tse dinke
Daan junt vuur ooch werm noa d’r noaber winke. 
Daan blieft oos Vols ziene jowwe naam ummer waed.
Daan blieft Vols d’r himmel oppen aed 
Daan viere vuur vasteloavend, vanaaf de baach bis oppene maat.
Dat is Vols oos Vols, zoe wie d’r Herrejot ’t how jedaat. Amen.